വർഗ്ഗീസിനു വീടില്ല

വർഗ്ഗീസിനു വീടില്ല
ഓഫീസിലാണു താമസം
യേശുവിന്റെ സ്വന്തം ആളാണു
കഴുത്തിൽ ഒരൊത്ത കൊന്തയുണ്ട്
അതിനൊത്ത മരക്കുരിശും
പണിയില്ലാത്ത ദിവസങ്ങളിൽ
പറമ്പിലായിരിക്കും
മരങ്ങളോടെന്തോ കാര്യമായ ശത്രുതയുണ്ട്
കണ്ണിൽ പെട്ടാൽ പണിതീർന്നു

നമ്മുടെ യേശുവിനെ മരത്തിൽ
തറച്ചിതിനാണോ നിനക്കിത്ര കേടെന്ന്
ഒരിക്കൽ ചോദിച്ചിട്ടുണ്ട്
അക്കേഷ്യയിൽ നിന്ന് ശ്വാസം മുട്ട്
കലശിൽ നിന്ന് ചൊറിയാമ്പുഴു...
എന്റെ ചേട്ടാ, നിങ്ങളെക്കാൾ മരങ്ങളോടെനിക്കാണു
സ്നേഹമെന്നവൻ ഇടയ്ക്കിടെ പറയും

വർഗ്ഗീസ് വെട്ടിയിട്ട മരങ്ങളിലെ
കിളികൾ കൂടന്വേഷിക്കുന്നത്
പല തവണ കണ്ടിട്ടുണ്ട്

ഓഫീസിലേക്കുള്ള വഴികളിലെ
പൊന്തകൾ മുഴുവൻ
വെട്ടിത്തെളിക്കലായിരുന്നു
വർഗ്ഗീസിന്റെ ഇന്നത്ത പണി
എന്തൊരു തെളിച്ചമെന്ന്
സിഗരറ്റ് വലിക്കാൻ ചെന്നപ്പോൾ
അവൻ തെളിച്ചപ്പെട്ടിരുന്നു

പാതിരാത്രി ഡ്യൂട്ടി കഴിഞ്ഞ്
വർഗ്ഗീസ് വെട്ടിത്തെളിച്ച വഴിയിലൂടെ
കാറോടിക്കുകയാണു
ഹെഡ് ലൈറ്റ് വെളിച്ചത്തിൽ

ഒരു മുയൽ അതിന്റെ പൊന്ത
തെരഞ്ഞുകൊണ്ടോടി നടക്കുന്നു


6 അഭിപ്രായങ്ങൾ:

ajith പറഞ്ഞു...

മുയലിനെയൊന്നും ഗൗനിക്കരുത്.
വഴി ക്ലിയറാണല്ലോ.

മുഹമ്മദ്‌ ആറങ്ങോട്ടുകര പറഞ്ഞു...

തെളിഞ്ഞ വഴിയെന്നപോലെ ഈ കവിത മനസ്സിലാകുന്നു. വരികളും വരികള്‍ക്കിടയിലെ വഴികളും.

delegate pudukad പറഞ്ഞു...

avasanam vargheessum muyalum onnupole, veedillathavar.....


arunan പറഞ്ഞു...


KAVITHA ITHANO MR

Shaheer Kunhappa.K.U പറഞ്ഞു...

തെളിച്ചമുള്ള വഴിയിലെ വെളിച്ചമാവുന്ന വാക്കുകൾ .....

Manoj Kumar M പറഞ്ഞു...

നമുക്ക് നമ്മുടെ വഴി.. അതന്നെ...