വാര്‍ത്താ വായനക്കാരന്‍

കടമറ്റത്തെ അച്ചൻ ചോദിച്ചു

ഇഷ്ടപ്പെട്ട പൂവേതാണ്

ശംഖ് പുഷ്പം എന്ന് പറഞ്ഞത്

ഗാർഗിയുടെ  കവിത ഓർത്തായിരുന്നില്ല

അപ്പോളതെവിടെ നിന്നു വിരിഞ്ഞൂവെന്ന്
പിന്നെ പല കുറിപുകഞ്ഞു

ഗാർഗി  മന്ദാകിനിയുടെ കൊച്ചുമകളാണ്

അജിതയുടെ മകളും

അയ്യപ്പന്റെ ഒരു കവിതയിൽ ഗാർഗിയുണ്ട്

കൂട്ടുകാരുടെ പല കവിതകളിലും അവളുടെ നിഴൽ  കണ്ടിട്ടുമുണ്ട്

എന്നാൽ  ഗാർഗിയുടെഒരു കവിതയിൽ

ശംഖ്പുഷ്പം  പെൺയോനിയാണു

"നമ്മുടെ അമ്മമാർ നമ്മെ നോക്കിചിരിക്കുന്നതാണ് " *

എന്നാലെനിക്ക് ശംഖ്പുഷ്പംഒരു കാതായി തോന്നുന്നു

ശംഖ്പുഷ്പം = യോനി

ശംഖ്പുഷ്പം = കാത്

കാത് = യോനി

കവിതയിലെനിക്കും

ചെറിയ കണക്കുകൾ ആവാമല്ലോ

അങ്ങനെയെങ്കിൽ  ഈരാത്രി

ഉരുക്കേണ്ടത് ഈയമല്ല

കാതിലൂടെ ഭോഗിക്കുന്ന ഒരു വന്യമായസ്വപ്നം

വായിക്കുന്നവർ  കണ്ടാൽ ഉത്തരവാദിഞാനുമല്ല

കാതിലൂടെയാണു  ഞാൻജീവിക്കുന്നത്

കാതിലൂടെ തന്നെയാണ് എനിക്ക് മറയേണ്ടത്

കാതിലൂടെ തന്നെയാണ് എനിക്ക് മരിക്കേണ്ടത്

പിന്നെയും പിന്നെയും പിന്നെയും

പിറക്കേണ്ടതും

( 2010 )

* ഗാർഗിയുടെ കവിതയിൽനിന്നും

പുതുകവിതയിൽ വന്നത്