ഭൂപടം

ഇന്ത്യയുടെ ഭൂപടം വരയ്ക്കുമ്പോൾ
കുഴൂര്‍ എവിടെയാണെന്നു ആകുലപ്പെട്ടിരുന്ന
ഒരു കുട്ടിയെ എനിക്കറിയാം

5 മിനിട്ടു കൊണ്ട് വരച്ചു തീര്‍ന്ന്
3 മാര്‍ക്ക് വാങ്ങേണ്ടിയിരുന്ന ആ കലാപരിപാടി
പലപ്പോഴും അവനെ വഴി തെറ്റിച്ചു

ചോദ്യപേപ്പറിനും ഉത്തരക്കടലാസിനുമിടക്കിരുന്നു
അവന്‍
തന്‍റെ തോടുകളും ചിറയും പാടങ്ങളും അനേഷിച്ചു

വര്‍ക്കി ചേട്ടന്‍റെ ചായക്കട ഇവിടെ
ഇറച്ചിവെട്ടു കട അവിടെ
ക്രിക്കറ്റു കളിക്കുന്നതിവിടെ

സുബ്രമണ്യസ്വാമി ക്ഷേത്രം അവിടെ


കുണ്ടൂര്‍ കടവു ഇവിടെ

കൂട്ടുകാര്‍ കാത്തുനില്‍ക്കുന്നതിവിടെ

പ്രീതി തിരിഞ്ഞു പോകുന്ന ഇടവഴിയവിടെ

എന്നിങ്ങനെ അടയാളപ്പെടുത്തി


വാണിംഗ് ബെൽ അടിച്ചാലും

ഇന്ത്യ വരച്ചു തീർന്നിട്ടുണ്ടാവില്ല


കാശ്മീര്‍ അടയാളപ്പെടുത്തിയിട്ടുണ്ടാവില്ല