കമറൂൾ നാട്ടിൽ പോകുന്നു

കമറൂൾ നാട്ടിൽ പോകുന്നു
അവനൊപ്പം
ഞങ്ങളെല്ലാവരും വീടുകളിലേക്ക് പോകുന്നു

കമറൂൾ പെങ്ങള്‍ക്ക്
ഒരു വള കൊണ്ട്പോകുന്നു
റഫീക്ക് ഒരു സ്വര്‍ണ്ണക്കടക്കു തന്നെവില പറയുന്നു

കമറൂൾ അമ്മയ്ക്ക്സാരി കൊണ്ടുപോകുന്നു
ദിവാകരന്‍ തുണിക്കട എവിടെയെന്നന്വേഷിക്കുന്നു

ചായയെടുക്കുമ്പോൾ
‍വേസ്റ്റ് ബാസ്ക്കറ്റുകള്‍ ഒഴിക്കുമ്പോൾ
പ്രിന്ററിൽ പുതിയ പേപ്പറുകൾ വയ്ക്കുമ്പോൾ

കമറൂൾ അവന്‍റെ മാത്രംമൂളിപ്പാട്ട് പാടുന്നു
ഞങ്ങളെല്ലാവരും
വളരെ സ്വകാര്യമായി ഉറക്കെ പാടുന്നു

ലിഫ്റ്റിറങ്ങുമ്പോള്‍ അവന്‍
4
3
2
1
എന്നെണ്ണി പഠിക്കുന്നു

ഞങ്ങളെല്ലാവരുംപൂജ്യത്തിലേക്ക് കുതിക്കുന്നു

ഭൂമിയിലെ ആ ചെടിയോടും
വൈകുന്നേരം വീശുന്ന കാറ്റിനോടും
വരാമെന്നു പറഞ്ഞ കൂട്ടുകാരനോടും

എല്ലാവരോടും,എല്ലാവര്‍ക്കും

ഞങ്ങളുടെ കത്തുകളുമായി
കമറൂൾ നാട്ടിലേക്ക് പോകുന്നു

ഭൂമിയില്‍ ഇപ്പോള്‍ സമയമെന്തായിരിക്കും
എന്നു വിചാരിച്ച്ഞങ്ങള്‍ കൈ വീശുന്നു

^2004

ഇടം

ആ കിയോസ്ക്കിന്‍റെ പുറകില്‍
ഒരു ഈന്തപ്പനയുണ്ട്

ദിവസവും
എട്ടോ, ഒന്‍പതോ പ്രാവശ്യം
അതിനു ചുവട്ടില്‍ നിന്നാണു
സിഗരറ്റ് വലിക്കുക

പതുക്കെ പതുക്കെ
ആ ഇടം സ്വന്തമായിത്തീര്‍ന്നതു പോലെയായി

ഇന്നിപ്പോള്‍ ഒരു നേരത്തു
ചെല്ലുമ്പോൾ അതാ അവിടെ
സിഗരറ്റുമായി വേറൊരാള്‍

എന്തു പറയും അയാളോട്
ആ ഇടം എന്റേതാണെന്നോ ?

സിഗരറ്റുകുറ്റികള്‍
തൂപ്പുകാര്‍ കളഞ്ഞിരിക്കുന്നു
ഈന്തപ്പനയോലകള്‍
താഴോട്ട് നില്പ്പുണ്ട്
(ഇന്നാണ് അതു
ആദ്യമായി കാണുന്നത് )

എല്ലാം ആദ്യമായി കാണും പോലെ
എന്റേതായി എന്തുണ്ടു അവിടെ

^2005

മൌലികത

പെയ്യുമ്പോൾ
‍ചാറ്റല്‍ മഴ ഗന്ധം പിടിക്കും
താന്‍ നനയിപ്പിക്കുന്ന മണ്ണിന്‍റെ

മണ്ണ് പറയും
പേമാരികള്‍
ഇടിമിന്നലുകൾ
‍പ്രളയം.......

നിന്‍റെ കുഞ്ഞുതുള്ളികള്‍
അതെല്ലാം
ഓര്‍മ്മിപ്പിക്കുക മാത്രം ചെയ്യുന്നു

നീരാവിയാക്കി
അമ്മയുടെ അടുത്തേക്ക് തിരിച്ചയക്കാൻ
‍ചാറ്റല്‍മഴ സൂര്യനോട്
പ്രാര്‍ഥിക്കുകയാണ്

സ്വയം മറന്ന്

ഇതിനെല്ലാമിടയില്‍
മുളച്ച
പച്ചപ്പുകള്‍ കരിയുമോ?


^ 2005

കുട്ടി കാടു കീറി

കാടിന്‍റെ ഫോട്ടോസ്റ്റാറ്റ് കോപ്പിയില്‍
അടയാളപ്പെടുത്തുക കുട്ടീ

ആകാശത്തേക്ക് നടക്കുന്നതു മരം
ഓടി മറയുന്നതു മാന്‍
ഒഴുകുന്നതു മീന്‍

കുത്തിവരക്കല്ലേ
മുയലുകള്‍ ചത്തുപോകും
പുല്ലുകള്‍ക്കു പേടിയാവും
കിളികളുടെ കണ്ണു പോകും
ഓര്‍മ്മയുടെ ഉരുള്‍ പൊട്ടും

പതുക്കെ പതുക്കെ

സിംഹങ്ങള്‍ ഉണരും
പുലികള്‍ അലറും
കടുവകള്‍ ചാടും

ഞെട്ടല്‍ വേണ്ട
വെടി പൊട്ടിയതാണു
വേട്ടക്കാരനെ തെരയേണ്ട കുട്ടീ

പിടി കിട്ടാത്ത
പുള്ളിയാണു

കുട്ടി കാട് കീറി

പൂച്ച

ഷാര്‍ജയില്‍ ഒരു പൂച്ചയുണ്ട്

അവന്‍റെ കണ്ണില്‍ മൂന്നെലികളുണ്ട്

അവയെക്കൊണ്ട് വയ്യ

ഉറങ്ങുമ്പോള്‍ വരും
ഉണ്ണുമ്പോഴും വരും
എപ്പഴാ വരാത്തതെന്ന് ചോദിച്ചാൽ മതിയല്ലോ

അതിലൊന്നിന്‍റെ കണ്ണിലുണ്ട് തീയുരുട്ടിയെടുത്ത ഒരു ഗോളം
അതിലൊന്നിന്‍റെ പല്ലിനുണ്ട് ഹ്യദയവും തലച്ചോറും കരളാനുള്ള ഉറപ്പ്
അതിലൊന്നിന്‍റെ കാതിന് ആയിരം കാതങ്ങള്‍ പോലും ഒരകലമല്ല

എങ്ങനെ കൊല്ലും അവറ്റകളെ
പൂച്ചയെ എനിക്കിഷ്ടമാണല്ലോ?

അവന്‍റെ കണ്ണിലാണല്ലോ എലികൾ

ഭൂപടം

ഇന്ത്യയുടെ ഭൂപടം വരയ്ക്കുമ്പോൾ
കുഴൂര്‍ എവിടെയാണെന്നു ആകുലപ്പെട്ടിരുന്ന
ഒരു കുട്ടിയെ എനിക്കറിയാം

5 മിനിട്ടു കൊണ്ട് വരച്ചു തീര്‍ന്ന്
3 മാര്‍ക്ക് വാങ്ങേണ്ടിയിരുന്ന ആ കലാപരിപാടി
പലപ്പോഴും അവനെ വഴി തെറ്റിച്ചു

ചോദ്യപേപ്പറിനും ഉത്തരക്കടലാസിനുമിടക്കിരുന്നു
അവന്‍
തന്‍റെ തോടുകളും ചിറയും പാടങ്ങളും അനേഷിച്ചു

വര്‍ക്കി ചേട്ടന്‍റെ ചായക്കട ഇവിടെ
ഇറച്ചിവെട്ടു കട അവിടെ
ക്രിക്കറ്റു കളിക്കുന്നതിവിടെ

സുബ്രമണ്യസ്വാമി ക്ഷേത്രം അവിടെ


കുണ്ടൂര്‍ കടവു ഇവിടെ

കൂട്ടുകാര്‍ കാത്തുനില്‍ക്കുന്നതിവിടെ

പ്രീതി തിരിഞ്ഞു പോകുന്ന ഇടവഴിയവിടെ

എന്നിങ്ങനെ അടയാളപ്പെടുത്തി


വാണിംഗ് ബെൽ അടിച്ചാലും

ഇന്ത്യ വരച്ചു തീർന്നിട്ടുണ്ടാവില്ല


കാശ്മീര്‍ അടയാളപ്പെടുത്തിയിട്ടുണ്ടാവില്ല

ഒരു കാലാവസ്ഥാ മുന്നറിയിപ്പ്; ഇന്ന് മഴ പെയ്തേക്കും

ഇന്ന് മഴ പെയ്തേക്കും
എന്നാരംഭിക്കുന്ന
ഒരു കവിത എഴുതണമെന്നുണ്ട്
ഇന്നല്ല
ഒരിക്കലും
ഇവിടെ മഴ പെയ്യില്ല
എന്നറിയാഞ്ഞിട്ടല്ല

മഴ പെയ്തേക്കും
എന്നാരംഭിക്കുന്ന എന്ന ഒരു കവിത
കാര്‍മേഘമായി ഉരുണ്ട് കൂടിയിട്ടുണ്ട്
ഏത് സമുദ്രത്തില്‍ നിന്നുള്ള
നീരാവിയാണ് അതിന്‍റെ ഇന്ധനം

ഇന്ന് ആ മഴ പെയ്തേക്കും
എന്നെഴുതി നിര്‍ത്തുകയേ
നിവൃത്തിയുള്ളൂ

കൊള്ളികള്‍

തീപ്പെട്ടികൾക്കുള്ളിൽ
നാം പാര്‍ക്കുന്നു

എപ്പോള്‍
വേണമെങ്കിലും
തീ പിടിക്കാവുന്ന
തലകളുമായി

സിഗരറ്റ്
ദൈവം

ജീവിതത്തിന്‍റെ
ഒരൊറ്റ ആളല്‍

അബുദാബി

സന്ധ്യകള്‍സന്ധ്യകള്‍ക്ക്
പ്രഭാതമുണ്ടെന്നു പഠിപ്പിച്ച നഗരമേ

നിന്‍റെ സന്ധ്യകളുടെ
സന്ധ്യകളില്‍
എത്രയോ തവണ
മറന്നു വച്ചു ഞാനെന്നെ

നീ ഒരു നഗരമേയല്ല

വിവർത്തനം ചെയ്യപ്പെട്ട
ഗ്രാമത്തിന്‍റെ
ആരും വായിക്കാത്ത ഒരേട്

പച്ച പിടിച്ച
ഇരുട്ടില്‍ ആദ്യം തുറന്നപ്പോൾ

മണ്ണെണ്ണ വിളക്കിന്റെ
വെളിച്ചത്തില്‍

സ്കൂള്‍ തുറക്കുന്നതിന്‍റെ തലേന്നു
പുതിയ പാഠപുസ്തകം
തുറന്നതിന്‍റെ ഗന്ധം

വിവര്‍ത്തനത്തിന് ഒരു വിഫലശ്രമം

കാക്ക

സ്വപ്നത്തില്‍ നാടിനെ വിവര്‍ത്തനം ചെയ്യുമ്പോള്‍
ഒരു കാക്ക വന്നു വിരുന്നു വിളിച്ചു
എണീറ്റ് നോക്കുമ്പോള്‍
അപ്പുറത്തെ ഫ്ലാറ്റിന്‍റെ ജനലില്‍
ഒരു പ്രാവു ഇരുന്നു ഉറങ്ങുന്നു

ഒന്നും മിണ്ടുന്നില്ല
വിരുന്നുകാരാ തിരിച്ചു പോകൂ
വിസയില്ലാതെ
എന്‍റെ സ്വപ്നത്തില്‍ കഴിയരുതേ

തെങ്ങുകള്‍

ഈന്തപ്പനകള്‍ചോദിച്ചു

തുറിച്ചു നോക്കുന്നതെന്തിന്
വിവര്‍ത്തന ശേഷമുള്ള
തെങ്ങുകളാണു ഞങ്ങൾ

മറന്നുവോ?

നീ അതു കണ്ടുവോ

ഒരേ സമയം
രണ്ട് ഇടങ്ങളില്‍ ഇരുന്നു
ഒരേ സ്വപ്നം കാണുന്ന
യന്ത്രം വികസിപ്പിച്ചെടുത്തതായി
ഞാന്‍ ഇന്നലെ സ്വപ്നം കണ്ടു

നീ അതു കണ്ടുവോ

കൃഷിക്കാരന്‍

രാവിലത്തെ നടത്തം കഴിഞ്ഞ്
നടന്ന് തന്നെ മടങ്ങുമ്പോൾ ചായക്കടയിൽ നിന്നും
രണ്ടു പഴം വാങ്ങി
പഴം തിന്നുമ്പോൾ ‍അത്
കൃഷി ചെയ്തയാളെ
ഭാവനയില്‍ വരച്ചു നോക്കി
ഞാനിപ്പോള്‍ തിന്നുന്ന പഴത്തിന്‍റെ
കൃഷിക്കാരൻ ‍ഇപ്പോളെവിടെയായിരിക്കും
അയാള്‍ ഉറങ്ങുകയാവുമോ
കൃഷി ചെയ്യുകയായിരിക്കുമോ

അയാള്‍ ഇപ്പോള്‍ ഉണ്ടാകുമോ

കൃഷിക്കാരനെ ഓര്‍ത്തപ്പോള്‍ കൃഷിക്കാരനായിരുന്ന
അപ്പനെ ഓര്‍മ്മ വന്നു
കഷ്ടം

ഒരു പഴം വേണ്ടി വന്നു
ഈ തെറിച്ച വിത്തിനു സ്വന്തം
കൃഷിക്കാരനെ ഓര്‍മ്മിക്കുവാന്‍

^ 2005

എഴുത്ത്

ഉള്ളിലെ
കണ്ണീരുമായി
ഓരോ നിമിഷവും
കടല്‍ വരും

നിമിഷം പോലും
നീളാത്ത ഒരുമ്മ നല്‍കി
കര എപ്പോഴും തിരിച്ചയക്കും

കണ്ണീരുപ്പു കലര്‍ത്തി
കടല്‍ കൊണ്ടുവന്ന
ചിപ്പിയും മുത്തും മാത്രം
കരയെടുക്കും

പിന്നീട്
കുഞ്ഞുങ്ങള്‍ക്ക്
കളിക്കാന്‍ കൊടുക്കും

[കടലിന്‍റെ ഹൃദയവുമായി ഓരോ നിമിഷവും കരയിലേക്ക് നീന്തുന്ന ഒരു തിരയുടെ എഴുത്താണിത്]

വേദനിക്കുന്നു

ശരീരം മുഴുവന്‍ വേദനിക്കുന്നു

തലയിൽ
‍കാലില്‍
എല്ലായിടത്തും

മിനിഞ്ഞാന്നു
ഓര്‍മ്മ
വേട്ടയാടിയതാണു

ഇന്നു തീര്‍ച്ചയായും ഹെല്‍മറ്റു വാങ്ങും

ഓര്‍മ്മയെ വെടി വച്ചു കൊല്ലും